नेपाल टेलिभिजनबाट प्रसारण हुँदै आएका दुई चर्चित हाँस्य टेलिश्रृखंला ‘जिरे खुर्सानी’ र ‘भद्रगोल’ बन्द भएका छन्। यी श्रृखंलाहरुको प्रायोजन र विज्ञापन जुटाउँदै आएको वल्ड भिजन एड्भर्टाइजिङले सिद्धार्थ बैङ्कमा विभिन्न टेलिभिजन कार्यक्रमका लागि राखेको पाँच करोड ८६ लाख बराबरको धितो रकम नक्कली सावित भएपछि यी कार्यक्रमको प्रसारण बन्द भएको हो। यसका नयाँ श्रृखंलाहरु प्रसारण भएका छैनन।यसै प्रकरणका कारण वल्ड भिजनका मालिक दिनेश श्रेष्ठ हनुमान ढोकामा थुनामा छन्। ‘भद्रगोल’का निर्देशक शंकर आचार्यले आफूहरुले छायांकन गरिरहेको बताए । तर, आफूले सुने अनुसार अझै ४ हप्ता यो सिरियल प्रशारण नहुने उनले बताए । नेपाल टेलिभिजन र वल्र्ड भिजनको टेन्डर विवादका कारण ‘जिरे खुर्सानी र भद्रगोल’ रोकिएको वुझिएको छ ।
शंकरले नयाँ टेण्डर खोल्ने तयारी नेपाल टेलिभिजनले गरिरहेको जानकारी दिएका छन् । यसै काण्ड संलग्न भएको देखिएकाले नेपाल टेलिभिजन व्यापार महाशाखा प्रवन्धक पवन माण्डव्य र आर्थिक महाशाखा प्रमुख राजन श्रेष्ठ नेपाल टेलिभिजनबाट पन्ध्र दिनका लागि निलम्बन परेका छन्। महाशाखा प्रवन्धक र आर्थिक महाशाखा प्रमुखको मिलेमतोमा वल्ड भिजनको हिसाब किताब टेलिभिजनसँग समयमै फर्स्यौट हुन सकेको छैन।
‘जिरे खुर्सानी’ नेपाल टेलिभिजनमा लामो समयदेखि प्रशारण हुँदै आएको छ भने ‘भद्रगोल’ पछिल्लो समय चर्चामा रहेको छ। यी कार्यक्रम नियमित प्रसारण कहिलेदेखि हुन्छ भन्नेमा केही टुगों लागेको छैन। ‘जिरे खुर्सानी’ टोली हाल नेपाल बाहिर रहेको छ।
